Devachea Mogacho Somarombh (Goa Mission Congress)
-hachê Ugttavnnê somoiar Arsebisp Filipe Neri Ferrão-an kel’li Boli
(Pilar, Febrerachi 6vi, 2009) 

Hê suater ani hea vellar tumkam soglleank, amcheam priticheam bhoinnim-bhavank polleun, hanv khuxal zatam ani ho mhozo survatecho nirop suru kortana, tumkam – amchea Raul Arsebispak, amcheam Iadnikank, Mottvaxeank ani Loukik bhav-bhoinnank, bhov korun Diu, Damanv Dadra ani Nagar Haveli prantant sun ailoleank -- mhozo hunhunit ani maiemogacho ievkar ditam! 

"Dev mhollear Moguch" mhonn amkam Bhagevont Juanv ugddas korta (1 Ju. 4:8).
Ani ho sondêx Povitr Pustokachea eka-eka panar zollkhota mhollear otitai zanvchinam.

Khorem mhollear, akhem Devachea Utrachem Pustok Dev Moguch mhonn amkam spôxtt korta. Hea Povitr Pustokacho maz mhollear Dev-Bapacho Jivo Sobd, JEZU. Jin’sam-bhasamnim apnnak soddun bhonvtolea moniskullak Dev sodit bhonvta ani veg-veglleam kallanr apnnak ovisvaxi zal’leam-xim -- tim apnna-xim portun ieunchê khatir -- apleam kherit provadeank pattoita. Xekim, kall bhortoch, amkam Dev-Mogachi ani Dev-Jivitachi vollôkh diunchê khatir, aplea ekleach Puta Jezuk amchê sorim to dhaddta. Hi kotha Dev-Mogachich!

Jezu, Devacho Sobd, monis zaun amchê modem jieta ani, aplea utra ani kornneam udexim, mon’xank Dev-Mogachi vollôkh diit hea sonvsarant bhonvta. Xekim, aple hat khursar vistarun, amchê pasot aplem somorponn to korta ani, hê toren, aplea punorjivontponnachea sontosant amkam bhagidar korta, mhonngê, amkam novem jivit -- Dev-Jivit -- favo korta. Dev-Mogachich kotha hi!

Jezun Povitr Atmea udexim sthaploli Povitr Sobha, heam nimanneam vis xekddeam pottim, zaum aplea sonvskari jivita vorvim, zaum aplea moga-jivitachê sakxê udexim, zaum aplea bhavartachê porgottnnê vorvim, hea Devachea Mogacho Somarombh korit ailea: - hi-i bi Dev-Mogachich kotha!

Kristi bhavartachem dennem, ostom’techeam dhormporgottnnaram udexim amam-Gõykarank pavlear ieta tea vorsak panch xekdde bhorche asat. Hêch amchê dhortorê thavn, zaum ostom’ti zaum dexi dhormporgottnnaram vorvim, Kristi Bhavart Udenticheam desamnim ximpddot-posrot gelo. Oxem, ekê vixêx toren, Gõychi Povitr Sobha Devachea Mogacho Somarombh korit aili.

Heam nimanneam pon’nas vorsam pottim, Povitr Sobhen don-chear ghoddnneam udexim kherit bhaxen aplea bhavartachea jivitacher khôl niall kelo ani aplea Sthapnnarakoddchem ghetlolem jivan’karia novea nettan dhorunk hurben bhorlolim panvlam ubarlim. Poili ghoddnni mhollear, Vatikani Dusri Vixv-Sobha, jichê somoiar Povitr Sobhecher eka novea Pentekostichem varem koxem marun, akhi Povitr Sobha purai novsornnechê vatter poddli ani tichea jivitant zaitim mhotvachim ani gorjechim bodlopam ghoddun ailim. Thoddea kallan, ekunn’noixim satth ani atth vorsa, Gõychê Povitr Sobhen, "Church in Goa Today" – hea mathallea khal tin disanchea eka Samelanan zomun, Vatikani Vixv-Sobhechem margdorxonn amchea dhormprantant koxê toren apnnavchem ani vevharant ghalchem tacher khôl obheas kelo. Anik eka vorsan, ekunn’noixim satth ani nov vorsa, "Church in India Today" mhonnun, ek Akhil-Bharati Samelan osleach monan somarombhlem. Sov vorsam pattim, don hozar ani don vorsa, Gõychê Dhormprantik Porixodê somoiar, amchê Povitr Sobhen anik ekdam ek ontoskornnik topasnni koxi korun, apunn koxê toren aplo bhavart jieta ani atanchea sonvsaracher probhav haddta tosli hea bhavartachi apli porgottnni koxi zaunk zai tacher zaiti zagrutai vaddoili. Heam soglleam ghoddnneam udexim, amchi Povitr Sobha bhoktiponnim Devachea Mogacho ani aplea Bhavartacho Somarombh korit ailea.

Don vorsam pattim, Aziecheam Bispanchê Porixodechea asrea khal, Thailand desant Asian Mission Congress-achi somarombhnni zali. Hea amchea Gõychea Mission Congress-acho Nimontrôk vô Convenor, Fadar Saturnino Dias, tea-i Aziechea Mission Congress-acho mukhêl Nimontrôk also. Azient Jezuchi Kotha koxi sangchi – hachê voir thoim khôl bhasabhas zali.

Atam ami amchea Bharatant osloch ek Bhavartacho Mellavo korunk mukhar sorleanv. Otumbrachea mhoineant zavpacho asa tea Akhil-Bharati Mellaveak toiari koxi, amchea Ostomt Vattharant (Western Region) ani amchea khas Mha-Dhormprantant ami oslech Mellave korunk ievjilam. Hakach lagun ami aiz hangasor ekttaim zaleanv. Poilê suater, Devan amcho oprimit mog kela ani amkam, aplea Puta ani Povitr Atmea vorvim, aplem jivit favo kelam tea khatir dhin’vasunk ami hanga zoma zaleanv. Amchea Povitr Snana vorvim ho Dev-Mog amkam ek-ekleak mell’la tea khatir ami ho Devachea Mogacho Somarombh korunk hanga asanv.

Jezun, Devachea Putan, aplea Bapakoddsun ghetlolem misanv vo jivan’karia pall’lem dekhun amkam Devacho Mog favo zala. Ho Mog ami chakla ani, amchea jivitachem karia vo misanv koxem, ho Mog ami dusreank vanttun diunk ani porgottunk zai. Hem misanv amchea Povitr Snana disa ami ghetlolem ani jivit-bhor tem ami portun-portun apnnaunk ani zagounk zai: hi amchi Kristi zobabdari.

Amchea Mellaveacho mukhel hetu mhollear hoch: Gõychi Kristi Porza koxi, amchi zobabdari konn bhaxen ami palltanv ani pallunk zai, amchea Bautizmant mell’lolem Bhavartachem dennem koxê toren ami vapuddtanv ani vapddunk zai, ami chaklolo Devacho Mog koso ami dusreank vanttun ditanv ani to koso porgottunk zai – hacher ani osleam vixoiancher ami niall ani vichar korun he tin dis ami hangasor borobor sartoleanv. Hem sogllem kortana, "Jezuchea Mogachea Ujean, Devacho Mog Ximpddaum-ia," ho vixoi amcheam dolleam mukhar ami dovortoleanv.

Hea vellar, mhaka Jeruzalea thavn Emaus vetoleam Jezucheam dogam xisancho ugddas ieta. Eka disa bhitor, tancho soddvonnar Jezu tankam na zal’lo. Tankam dislolem ki Jezu tankam Rom’karanchea chopkeantlim soddoitolo aslo mhonn. Punn teanch Rom’karanchea chopkeak sampddun, Jezuk ek lojechem, khursachem moronn favo zal’lem. Hem polleun, te sogllech niraxi zatat ani hea niraxiponnak patt korunk, te Jeruzaleachem xhar soddun, dusrea ganvant vochpachi vatt dhortat. Tanchem jivit sogllench guspol’lem, gondhollak sampoddlolem. Punn te vatter astana, khud Jezu – Jivont zal’lo Jezu – tanchê borobor cholunk lagta ani aplê chalibolintlean tanchim kallzam eka novea ujean, ekê novê hurben ulpom-xim korta. Tanchem jivit eka novea bhorvanxean ani bollan jieunk to tankam ek avhan korta. Dis dharir poddlolo, jivit tanchem kallokant buddlolem. Punn avchit, tea ratchea vellar, ek novem fantem koxem tanchea jivitant udeta ani, rat mhonn pollenastana, te dog ixtt, thoinchea thoinch, Jeruzaleak vochpachi ikra kilometranchi porti vatt dhortat. Tanchea kallzant-monant ekuch xizta: apnnak mell’lolo Jivont Jezucho onnbhov apleam ixttank vanttun diuncho, tanchim-i pisoddlolim jivitam novea bhorvanxean ani bollan bhorchim. Punn dusrench zata. Jeruzaleak pavchê-pavun, tanche ixtt tankam khuxalkaien Jezu apnnankui dixtti poddlo mhonn porgott’tat. Oxem, te ekamekakodde aplo onnbhov vanttun ditat, ekamekachem xiktat ani ekamekacho bhavart ghôtt kortat.

Heam tinui disamnim hanga mellun, oslench kitem ami kortoleanv: amchea bhavartacho onnbhov dusreank diunk ani dusreanchea onnbhovantlean amcho bhavart odik grêst korunk ami vavurtoleanv. Hê toren, Emaus-acheam ixttam porim ami Jezuchea Mogachea ujean ulpon, amchê bhonvtim Devacho Mog ximpddaunk ami pavtoleanv.

Dha vorsam pattim, ekunn’noixim novod ani nov vorsa (1999), sorgêst Juanv Paulu Dusrea Pap Saiban, Delhi xharant ieun, Aziecheam Bispanchi Porixôd – hichê uprant Ecclesia in Asia vô Azient Povitr Sobha hea nanva khal apnnem boroilolea dakleachem prokaxonn kelem. Hea dakleant Aziechê Povitr Sobhen Jezuchi porgottnni koxi korchi – hea vixim tachim sopnam to porgott’ta. Hea dakleacho ek môttvoch punn chodd mhotvacho utaro tumchê mukhar atam dovortam:

"Fokt ujean ulpotolê vostun dusream vostunk ulpaum ieta. Oxem astam, Azient Jezuchê borê khobrechi porgottnni iesvont zatoli zalear, ekuch vost gorjechi: Bispamnim, Iadnikamnim, Mottvaxeamnim ani Loukikamnim, apunn poilim Jezuchea mogan ulpon, mon’xamnim tachi vollôkh odik vistaran gheunchi, tacho mog odik kholaien korcho ani tacho pattlav odik lagsarponnan dhorcho mhonn tim pott’tiddken ani hurben lhasun vechim."

Hea Bhavartachea Mellaveacho fôll hoch zanvcho: amchim kallzam-monam Jezuchea mogan ulpon, amcheam utramnim ani jivitachê chalin Devacho Mog ami ximpddaunk pavum ani oxem Gõychi Povitr Sobha eka novea jivan bhoron ieum ani ekê novê hurben Jezuchi porgottnni korunk xikum.

Emaus-acheam xisamnim Jezu lagim apnna-xim rav mhonn maglem. Teach Jezu lagim, he tin dis bhor amchê modem rav ani amchim kallzam ulpai mhonn magun, ho Bhavartacho Mellavo hanv atam ugtto porgott’tam!