DEVACHEA MOGACHO SOMAROMBH 

(GOA MISSION CONGRESS)

MAIN OFFICE: CARITAS COMPLEX, NEAR CACULO CIRCLE,
PANJIM, GOA–403 001 Ph: 2220496; 2230021;

E-mail: frsaturninodias@yahoo.in; diasmario2002@yahoo.com  

Novembrache 18ver 2008

Mogall Padri bhavamno, Mottvaxi bhavam-bhoinnimno, Ixttamno,

Novsornni-chea (Renewal) Novembrachea poilea ankar amchea Arsebisp Filipe Neri Ferrão hachem Prosidh Potr ailam tem vachun tumi tumche porjek vo tumchea vangdda vaurtoleank kolloilam zatolem mhunn ravtanv. Tem "Devachea Mogacho Somarombh" hea mhatallea khal Pilar zauncho asa tea Misionar Mellavea (Goa Mission Congress) pasot boroilam. ‘Jezuchi Kotha’ Asient sangpachi halchal amche Gõyche zomnir than phattleam xekddeamnim boreach promannan zal’li. Devachech hukumen amchea purvozamnim he iozonnek sontosan veng marli dekun Kristi bhavarthacho uzo perlo, tiglo ani ozun perot asa – hea sogtta pasot tantunt Devachi tust kelea.

2006 vorsa Otubrache 18ver tem 22ver porean Thailanddak, Chiangmai xharant bhorloli ti Asientli Dhormporgottnechi Poili Porixod (First Asian Mission Congress) bhavarthacho ek porzollit somarombh zal’lo. Kheritponnim loukikamnim tantunt aplea bhavarthachi sakxi dili; obhimanan aplem Kristi daiz ani vorteponn tannim thoim porgott kelem.

Te Asieche Porixodint suchoil’lem toxem, te meren, osleo Dhormporgottnecheo Porixodi vo Mellave Asiechea sobar desamnim zait asat. Tosloch Bharati Mellavo 2009 vorsa, Otubrache 14ver-18ver Mumboi xharant zatolo. Hea mellaveache toyare pasot tallave ani diosezan mellave zatole. Gõy Ostom’techea vattharant poddta dekun, amcho Tallavo Mellavo (Regional Mission Congress) 2009 vorsa, Abrilache 30ver to Maiache 3rer porian zatolo ani Gõycho Mellavo (Goa Mission Congress) 2009 vorsa, Febrelache 6ver to 8ver porean: he donui mellave Pilar zatole.

Amchea Gõychea Dhormporgottnechea Mellaveacho mukhel vixoi zaun asa "Jezuchea Mogachea Ujean Devacho Mog Ximpddaum-ia". Ho mellavo tin dis choltolo ani ami amchea bhavarthachea jivitacheo tin goddio monant dhorun amcho somarombh kortoleanv. Hem voros Bhag. Pauluk bhettoil’lem dekun tachech koddsun dor disa amche up-vixoi ghetoleanv:

1. Poilo Dis: Bhavarthachi survat amchea jivitant (Poili porghottni) "Hanv atam jietam to hanv nhoi; tor Krist mhoje thãi jieta". (Gal. 2:20)
2. Dusro Dis: Bhavarthachi kholavnni ani amchea jivitachi govai "Kristacho mog amkam thar dinam …". (2Kor. 5: 14)
3. Tisro Dis: Bhavarthachea jivitachi govai ani Porghottni Dusreank "Devachea Mogachi Khobor hanv ximpddaina zalear, mhojem kotta!". (cf. 1Kor 9:16)

He vixoi monant dhorun amche Sevadhormik Somitin toyar kel’lim Krist Ienneachea Kallachea Aitarank provochonak suchna tumkam "Amchea Sevadhormantlean" pavleant mhunn ravtam. Sodeak porjechi toyari korunk ami tumkam amche Dotorniche Somitin kel’le Bhavarth kholaunche patt dhaddleat. Tancho tumi tumchea provochonak-ui upiog korum ieta, punn odik korun zomeanim bhasabhas korunk tancho upiog korunk magtam. Somudaianche zomatinim, Gonvllik Firgoz Sobhechea ani dusream Sonvsthanchea zomatinim (CFC, CFM, Marriage Encounter, Moriechi Fouz, St. Vincent de Paul, Extraordinary Ministers of the Eucharist, Dotorn Xikoupi, Tornnattim, Vedi Sevok, Igorjent manddavoll rakhtolim, adi. - hea sogottanchea zomeanim) toxench Mottvaxeanchea Konventamnim te patt gheun bhasabhas korunk magtam. Oxem zonn ekleacho bhavarth odik kholaun sogttanchi borobor hea Dhormporghottnechea Mellaveak toyari korum-ia. He porim, ami sogllim ap-aplea jivitache bodol’le chalin Devacho Mog somarombhunk ani ximpddaunk aitim zaum-ia. Chotrai dhorat he patt ek-ek korum ieta punn don-don borobor kelear odik faideachem zatlem karann dusro patt Devachem Utor poilea vixoia vixim koslo uzvadd dita tem dakhoita. Amchea purvozanim Gõyam than akhe Asient ho Mog ximpddail’lo tosoch atam-i nove sfurtin to ximpddaunk amkam hem ek avhan zaunchem. Tumchea adaran ani hurben hem goddonk xokta. Tem korunk xitaben vaurum-ia!

Amcho vaur sufoll zaunk Devacheach adarachi goroz asa dekun ek khasgi Magnnem toyar kelam tem-i tumkam dhaddlam. Tem igorzanim, kopelanim, ghorabeanim, ani mottvaxeanchea somudaianim dispottim korchem; toxench sobar zomatinim-i korchem mhonn amchi vinonti. Arsebispan-ui oxem korunk sang mhunn maglam. Tech porim hea Mellaveache vixoi monant dhorun amcho bhavarth zagounk, kholaunk, ani ucharunk sompem korunk ek Vixoi Gaion (Theme Song) kelam tem-i dhaddlam, tem soglleamnim gaion korunk xikchem ani magnnea uprant tem-i-bi gaunchem. Gaion xikonk soglleank sompem korchea monan ek CD kelea. Suchounni: Magnnem ani Vixoi Gaion tumchea firgoz potrar vo Somudaianchea potrar chap’plear soglleam ghorabeanim ani Somudaianim odik sompeponnim pavtolem ani soglleank hatak melltolem! Bhavarth kholaunche patt, Magnnem ani Vixoi Gaionachi CD tumkam pavonk nant zalear upkar korun Moddganvam ‘Light House’ vo Ponnje ‘Pastoral Secretariat’ vo Mapxeam Igorjeche kocherint san magchim.

Hea Mellaveak ek "Logo"-i bi toyar kela to tumkam hea Novsornni-chea poilea panar dista. Tachi somzonni-i Novsornni-cher dilea. Hea Mellaveachi toyari suddsuddaien zauncheak ek "Core Committee" nemlea tichi khobor tumim Novsornnechea phattlea ankar vachlea astoli. Tea bhair heo Somiti ghoddleat:

Kariavoll Somiti (Convenor: Pri. Seby Mascarenhas), Sevadhormik Somiti (C: Pri. Afonso Mendonça), Sonvskruttik Somiti (C: Sr. Jenifer Fernandes, SFN), Dotornichi Somiti (C: Pri. Alfred Vaz), Prochara Somiti (C: Pri. Francisco Caldeira), Duddvam Somiti (C: Pri. Cristovão Caldeira). Heo soglleo Somiti don mukhel Kocherink bhandloleo asat. Ek Vixv Kocheri (General Secretariat: C: Pri. Saturnino Dias ani Chitnis: Sr. Sharon Vaz, HC) ani dusri Svateveli (Pilar) Kocheri (Venue Secretariat: C: Pri. Nazareth Fernandes). Ap-aplem karia fuddem vhoronk tanche protinidhi tumchea darar marit tedna tumim tumcho urbhebhorit sohokar ditole mhunn ravtanv. Tumchem vo Igorjechem/Konventachem e-mail asa zalear voir hanvem dilam tea e-mailar amkam tumchem/ Igorjechem/ Konventachem e-mail dhaddlear faideachem zatolem.

He chitti vorvim hanv anik ek upkar magtam: tumchi firgoz dhaddtoli team protinidhinchi mahiti (delegates) diunk. Tumche firgojeche protinidhi kitle zaunche? Koxe vinchun kaddche? Heam vicharank zobab diunk sompem korunk ami oxem ieujilam:

• Kitle protinidhi? Tumche firgojent Kristi lok asa tea pormonnem tumi tharav gheuncho ani amkam sangchem he nodren: 200 unnem lok asa thuincho ek-ui protinidhi magonanv – Dusream Firgozanche Protinidhi he porim: 200 – 1,000 porian lok asa thuim: 1; 1,000 – 3,000: 2; 3,000 – 6,000: 3; 6,000 –10,000: 4; 10,000–15,000: 5; 15,000 +: 6.
  
   
•  
• Koxe vinchun kaddche? Poile svater he protinidhi fokot loukikanchech. Padri ani mottvaxi dusre bhaxen vinchun ietole ani tankam hanv kuxin boroitolom. Toxench DPC-che ExCo-che vangddi DPC vatten ietole. Mhunntoch, hankam soddun tumchea loukikam modle voir dakhoilea te pod’dotin tumche firgojen dhaddunk zatat titlech protinidhi oxe vinchun kaddche: Misanvacho vaur kortat tantlo, dotorn xikoupeantlo, firgojentlea sobar Sonvsthanchea vangddeantlo, firgojechea sobar vavrant fuddariponn dakhoitoleantlo, adi. Toxench, dog vo tea-on chodd dhaddunk zatat zalear vinchun kaddtana soglle gotincheam monxank soeg diunk hem-i monant dhorchem: dadlo, bhail, tornnatto, tornnattem, punn zata te bhaxen novea monxank soeg diuncho.
•  

Tumche protinidhi vinchun kaddtoch tanchim nanvam, pot’to ani phone amchea voir dil’lea pot’tear dhaddunk magtam, zata title vegim punn konnui bhaxen Dezembrache 20ver adim.

Vigar Varank (Deans) kherit vinonti: Misanvache nodren tumche firgojecho/ varadacho misionar ithias dakhoun Mellaveachea disamnim ek Dakhounni (Exhibition) korunk tumcho adar magtam.

Misanvache Dakhounnent dor Varadant poile misionar kedna ani koxe pavle, poilem Mis kedna ani khuinchea zagear somarombhlem, poilo Khuris/Kopel/Igorz kedna bhandli ani Kristi porza koxi vaddli ani az meren kitli vaddlea, igorjechim ghoram, iskolam kedna suru zalim ani kitlim vaddleant, aiz kitle padri, madri, konvent, adi asat ani koslo koslo vavr kortat – hea sogtta vixim mahiti diunchi. Ganvchea lokak bhou korun tornnatteank hea vixim choukoxi korunk lailear tanchea Kristi orombhachem xikop korunk tankam soeg zatolo ani tanchi urbha-i vaddtoli. Ani tankanch to ithias termokolacher bosounk vo chitarunk laixat zalear amkam thodde nove kholakar-ui mellot.

Tumchea sohokaran ani hurben Gõy anik ekdam Misionari mollar unchlea panvddear pavounk axeun tumche adim fuddench abhar mantam.

Bhavponnachea maiemogan tumcho,

Fr. Saturnino Dias
(Convenor)