DEVACHEA MOGACHO SOMAROMBH

Pri. Saturnino Dias (Convenor)

Bhou manest Arsebisp Filipe Neri Ferrao, Bhou manest Arsebisp Raul N. Gonsalves, Bhou manest Bisp Alwyn Barreto, Manest Vigar Jeral, Pri. Remedios Fernandes, Manest Pri. Tony Lopes, SFX Pilarche Sonvthecho Sorv-Vhoddil, Manadik padri bhavamno, Manadik Mottvaxi bhavam-bhoinnimno, Priticheam bhavam-bhoinnino ani ixttamno,

Bhavam-bhoinnimno,

Aiz ami anga ekttovleanv eka kherit karonna pasot: “Devacho Mog somorombhunk” ani hea Mellaveak ami nanv dilam: DEVACHEA MOGACHO SOMAROMBH (Celebration of God’s love).

1. Dev amcho mog korta – hem sot amchea kallzant ghott rombonk zai.
• Hem sot amkam Kristanvank soglleam oddchonneam modem dhir bhorvanso dita ani niraxiponn poisaita. Tem ami bhavartan mantanv kiteak Bhag Zuanv sangta: “Devan amcho itlo mog kelo ki Tannem Aplea ekleach Putak vopun dilo.” (Ju. 3:16). Ekleach Putak diun Devan amkam sogllem dilem ani hachea-on vhodd mog na. Ho Devacho mog ami khuxalkaien somarombhtanv. 
• Devan Aplea Putak kitea pasot dilo? Toch Bhag Zuanv anik-ui sangta: Devan Aplea Putak dilo “Tacher visvas thevtat … tankam sasnnachem jivit mellcheak.” Bautizma vorvim ami bhavarth ghetla ani Jezu ekloch Soddvonnar mhunn Tacher visvas dhorunk pavleanv. Bautizma vorvim ami Jezuche Guddarth Kuddiche sandhe zaleanv ani Jezu vorvim ami Devachim apnnailolim bhurgim zaleanv. Te meren ami Krista jivit jieunk lagleanv ani dekun amkam sasnnachem jivit favo zata. Hem-i Deavachea mogachem dennem ani ami amchea Bautizma disache khuxalkaien somarombhtanv. Hench ami hea Mellaveachea Vixoi Gaionant khuxalkaien gaitanv ani gaitoleanv.
• Te meren ami Jezuk bhettleanv ani amkam Krista jivit favo zalam; ami Krista jivit jieunk lagleanv ani dekun amkam sasnnachem jivit favo zata.
• Khorench, hea Mellaveant ami dusrem kainch korinanv bogor ho Devacho mog khuxalkaien somarombhtanv. Tumi chotrai dhorlea zalear, hench ami hea Mellaveachea Vixoi Gaionant khuxalkaien gailam ani gaitanv.

2. Ami kherit bhaxen ho Devacho mog somarombhtanv amchea mannkulea Gõya pasot; karonn, Devachê iozonnen, Asienchea Belea xharant suru zal’li ti Soddvonnar ‘Jezuchi Kotha’ akhea sonvsarak sangpachi halchal amchê Gõychê zomnir than boreach promannan vistaron geli. 2010 vorsa hê ghoddnnek 500 vorsam bhortat. Hea panch xekddeancho itihas lamb ani Devachea ojapamnim bhorlolo. Zaiteam oddchonnim modem amchea purvozamnim hê iozonnek sontosan veng marli ani hi Jezuchi Kotha sangpachi iozonn fuddem geli. Heam misionaram modem chodd porzollta to Bhag. Fransisk Xavier. Ispanhak than amchea Bharatant ieun Goeam tannem aplem bhiradd kelem ani sumar 10 vorsam Azient bhonvun, zaiteam desantleam lokak Jezuchi vollokh pavoili. Hea bhagevontak soglle Goenkar “Goycho Saib” mhunn pachartat. Hi-i bi ek khuxalkaiechi khobor ani ami khuxalkaien somorombhtanv.

3.  Kherit bhaxen ho Devacho mog ami somarombhtanv amchea mannkulea Gõya pasot. Devachêch iozonnen, Aziechea Belea xharant suru zal’li ti Soddvonnar ‘Jezuchea Mogachi Kotha’ akhea sonvsarak sangpachi halchal Gõychê zomnir than boreach promannan vistaron geli. 2010 vorsa hê ghoddnek 500 vorsam bhortat. Hea panch xekddeancho itihas Devachea ojapamnim bhorlolo. Zaiteam oddchonnim modem amchea purvozamnim hi Jezuchi Kotha sontosan ximpddaili. Heam misionaram modem chodd porzollta to Bhag. Fransisk Xavier. Ispanhak than ieun Goeam tannem aplem bhiradd kelem ani sumar 10 vorsam Azient bhonvun, zaiteam desantleam lokak, bhou korun durboll lokak Jezucho mog ani vollokh pavoili. Taka soglle Goenkar “Gõycho Saib” mhunn pachartat. Hem-i ami khuxalkaien somarombhtanv.

4.  Amchem anik ek daiz mhollear amche Gõykar bhav-bhoinni hoch bhavarth gheun amchea Bharotachea sobar vattharamnim gelim ani ak’kho sonvsar bhor ximpoddlim. Gelint thoimsor tannim Devacho mog ximpddailo ani tea-tea ganvchea lokak gheun tannim tallaveô (regional) Povitr Sobha ghoddleô. Hanchê modem Bhoktivont Juze Vaz ekdomuch porzollta. Jezuchi Kotha sangonk tannem motvachi novi podot dakoili: Sri Lankechea sonskrutik lokbhaxen ti Kotha sangli ani Jezuk Sri Lankechem mukhamoll asa tem uzvaddailem. Hê toren, thoim palot vetalo to Katolk bhavart tannem zagoilo ani peroilo. Hem-i ami somarombhtoleanv. Toxench porzolltat Maniavont Pri Agnelo de Souza ani teg Ghoddnar Goenchea Mottvaxi Sonvstanche: Pri. Jose Mariano C. Bento Martins, Ghoddnar “Missionaries of St. Francis Xavier” he Sonvstheco, Mons. Herculano Gonsalves, Ghoddnar “Sisters of St. Alex” atam “Handmaids of Christ” he Sonvsthecho, ani Pri. Faustino de Souza, “Holy Family of Nazareth” he Sonvsthecho.

5.  Tea bhair, Bautizma disa suru zalam tem Krista jivit disan disa vaddot veta ani amkam Krista sarkeant vaddoita. Punn ami osokt monxam, tem jivit patka vorvim ami zaite pavtti ogddaitanv, bhov korun sonvsari vostu amkam bhuloitat ani koxtt tras poddtat tedna. Tori-i ami niraxi zaunchi goroz na. Koxttam trasamnim pavlam marunk Deva Utor amkam sfurti dita ani Sonvskar ghottai xokti ditat. Hem ami hea disamnim govaiki ditoleanchea tonddim aikotoleanv ani onbhovtoleanv ani amcho bhavarth odhik ghott kortoleanv. Hi-i Devachea mogachi khunna ami somarombhtanv.
 

6.  Dubhavaviret, dusreanim ho Devacho mog koso chakla-onbhovla tem aikon amchea-i jivitant ho Mog kitlo porzoll’la tem amkam thavem zata ani hea mogachi govaiki diunk amkam-i sfurti mellta. Jezun amcho mog kela tosoch ami-i ekamekacho mog korunk Tannem amkam adnea dil’li asa (cf Ju 13:34) ani tannem mholl’lam: “Ekamekacho mog korxat zalear, tumi Mhoje xis mhonn soglleam mon’xank kolltolem” (Ju 13:35). Khorem:
• ekameka sovem mog dakhoun ani bhou korun somazant cheploleanchi seva korun ami Moga somudai bandtanv: dusreank boreponn dakhoitanv ani dusreanchem boreponn vollkhotanv;
• teach mogachea ujean vankddea rostear pavleat vo pavonk xoktat tankam ami mogan jikun gheunk vaurtanv. Onit vad-vivad asat tanche modleo dusmankaio poisaun nit ani xanti somadan haddunk ami vaurtanv bhou korun xikxonnentlean ani somazant cheploleanchi seva korun. He porim Somazant ami mitt uzvadd zatanv ani Kristak govaiki ditanv. Dusrea utramnim: Kristak porghott’tanv – dusream sovem Devacho mog ximpddaunk pattoilolim monxam zatanv - misionar zatanv.
• Atam, “misanv”, “misionar” him utram aikon zaiteanchea monant dhorm bodolpacho husko ieta ani hakach lagon kaim zonn amcher add uloitat ani dumallo pasun ditat;
• punn Jezu vorvim ami chakla to Devacho mog udarponnan ami dusream sovem dakoitanv dekun konn Devacho Mog chakta ani Jezuk ollkonk pavta ani aplea jivitachi chal boldun Jezucho xis zaunk sodta zalear konnachean taka addaunk zait?
• Jivitachi chal boldop dhorm boldinastanna-i zaunk xokta mhunn zaitim chintunk vochonant:
- aplea bhavarta pormonnem jienaslo konn ek Kristanv atam Jezucho mog novean chakon jivitachi chal boldun aplea bhavarta pormonnem jieunk lagonk xokta;
- vo konn Kristanv nhoi to munis amche vorvim Jezucho mog chakonk pavta ani aplea jivitachi chal ani dhorm pasun boldun Jezucho xis zata.
Heam disamnim sobar govai ditoleanche tonddim tim koslem jivit jietalim ani tanchea jivitant koslem ani koxem boldop zalam tem ami aikotoleanv. Hea sogttant Devacho mog porzollta to ami somarombhtoleanv.

7.  Vis xekdde bolanddun geleat ani Soddvonnar Jezuchê Kanniecho vistar zait asa, Jezuchea mukhamollacheô noveô-noveô bazu disot asat ani tea pormonnem ekê novê toren Jezuchi Kanni sangchi poddta. Hacher Aziechea Bispanchea Sinodan kel’lea nihallacho fôll koso, Zuanv Paulu II Pap Saiban, Ecclesia in Asia (Azientli Igorz) - ho dakhlo porgottlo.
Hea dakhleant adhunik kallantlê Azientlê Povitr Sobhen Jezuchi Kanni Azientlea lokak som’zota tê bhaxen koxi sangchi – hachê voir, kholaien, ghombirponnan ani pott’tiddken nihall kela ani margdorxonn dilam. Hê xikovnnek poiloch zobab 2006 vorsa Otubrachê 18 tem 22ver Thailanddak, Chiangmai xharant bhorlolê Azientlê Dhormporgottnnechê Poilê Porixodentlean (First Asian Mission Congress) mell’lo. Hi Porixôd bhavartacho ek porzollit somarombh zal’lo. Bhou korun loukikamnim thoim aplea bhavartachi sakxi dili.
Osle bhavartache onnbhov amchea Gõyant zaite asat. Te sobhemazar porgottun, bhavartacho somarombh kortanv polkê boddaiek lagon nhoi, punn amcheruch nodor ghalun amchea bhavartachi chovkoxi korunk ani, borem tem polleun, Devachim koutik kortutvam porgottunk ani fuddlem jivit heach bhavartachea avhanam pormannem jieunk.

8.  Ho somarombh anik eka mullavea karannak lagon kortanv, “Ak’khea sonvsarak vochat ani sogllê rochnnêk Bori Khobor porgottat” (Mk. 16: 15) -- hi Jezuchi adnia pallunk.
Hem monant dhorun, Azieche Dhormporgottnneche Porixodichea Sondesant Aziechea Desam desanim osle Mellave korunk ulo kel’lo ani atam te Aziechea sobar Desamnim ani diosezinim zait asat. Akhe Indiecho Mellavo heach vorsa, Otubrachê 14-18ver Mumboi xharant zatolo. Hea mellaveachê toyarê pasot tallave ani diosezan mellave zatole. Ho zaun asa Gõy Diosezicho Mellavo. Gõy Ostom’techea vattharant poddta dekun, hech svater amcho Tallavo (Regional) Mellavo Abrilachê 30ver to Maiachê 3rer porian zatolo.
Heach pasot ami tumche lagim heo vinonti kortanv:

1. Soglleamnim akhea Mellaveant vantto gheuncho, mhonnge sokallchea 7.00 vorancher suru korun ratchem jevonn pasun angach korchem. Jevnna vellar amchea bhavartache onnbhov ami ekamekak kolloum ietat, amchi ixttagot odik vaddoum ieta ani bhavartachea jivitant ekamekak odik lagim ieum ieta.

2. Toxench jim konn sezarchea familimnim ravtat tankam ek boro soeg anga ghetat to onnbhov tea familinchea vangddeank pavounk ani tumche firgojechea toxench angache firgojechea bhavarta jivita vixim gozal korunk. Hem-i bi faideachem zaunk xokta.

3. Toxench tumi vell mellta tedna sobar Varadanche ani amchea Seminarinche ani Goeam rochon ail’leam Mottvaxi ghorancho Misionar ithias spoxt kortole dekhave (poster) asat tancher chotraien nodor ghalchi. Thuimsor az meren noko asleli tumcheach ganvchi pasun khobor tumkam mellonk xokta. Amcho girest misanvacho ithias amcho bhavarth odik kholaunk ani hurben tache pasot vavrunk anik ek karonn zaunk xokta.

4. Amcho bhavart kholaunk ami sat path (catechetical modules) toiar kel’le te toxench Vixoi Gaionachi CD konnak zai zalear vikrek dovorlolim asat pustokam viktat thuim.

Hea mellaveant Amche Katolk nhoi te Kristanv bhavank-ui ami apoileat karann te-i amche barabor hea Bhavartache bhageli. Toxench ami Kristanv nhoi tea dhormanchea bhavank apoileat tannim-i amche vixim don utram sangonk, tankam ami manvonant pasun zalear punn kiteak manvonant tem kolloun ani tankam ami adim fuddench dhinvastanv.

Tor, ho Mellavo zaum-di ek soeg ani avhan amche bhitorlea zonn eklean aplo bhavarth zagounk, kholaunk ani tea bhavartha pormonnem jieun, ap-aplem jivit thambonaslolo Devachea mogacho somarombh korunk. Hê porim, ami sogllim, Gõychi Povitr Sobha, Jezuchea Mogachea Ujean Devacho Mog ak’khea sonvsarant ximpddaunk pavum! Oslea bhavnnamni bhoron ami sogllim hea Mellaveant khuxalkaien vantto gheum-ia ani ho Mellavo sufôll korunk vaurum-ia.