SONDÊX (MESSAGE)

Devachea Mogacho Somarombh
Goa Mission Congress
Pilar, February 6-8, 2009

SONDÊX

Devachea Mogachi khobor ximpddaunk “Kristacho mog amkam thar dina” (2 Kor. 5:14). Devan mon’xak mogan aplea sarkeacho rochlo. Jen’na mon’xan patok adarlem, ten’na taka novean aplo mog chakunk diunk Dev vavurlo ani xekim aplea Putak tannem hea sonvsarant ek mogacho misionar koso pattoilo. Aplea jivitant, utram-korneamnim, mornnant ani jivontponnant Jezun aplo xim’-mer naslolo mog mon’xam modem ximpddailo ani mogan tanchi soddvonn keli.

Ho mogan kel’lo soddvonnecho vavr fuddem vhorunk, Jezun apostlank sonvsaracheam ximam porian pattoile. Kall sortam-sortam, noveam-noveam mon’xamnim Jezuchea mogachi khobor ximpddaunchea vavrak khand marlo. Bhagevont Fransisk Xavier hi mogachi khobor gheun panch xekdde zale amchea Gõyam ailo ani tachê udexim amkam Jezuchem jivit favo zalem.

Apleak mell’lolem bhavartachem bhanddar dusreank vanttchê hurben, amche zaite Gõykar misionar veg-veglleam vattharamnim gele; tanchê modem Bhoktivont Juze Vaz ani Maneavont Padr Agnel de Souza kheritponnim porzoll’le.

Nagar Haveli vattharant Devachea mogachi khobor Gõycheanch misionaram vorvim pavli. Hea vattharant-sun itlea lokan khaxa hea tin disanchea “Devachea Mogachea Somarombhant” hurben vantto ghetlo dekhun ami bharim sontostanv!

Hea mellaveant ekamekache mogache onnbhov aikun, amcho bhavart vaddlo ani Devacho mog amcheam kuttumbamnim, vaddeamnim ani akhea sonvsarak porgottunk Jezuchem avhan amchea kallzant noveach bollan gazlem. 

  1. Devacho mog survekuch amcheam kuttumbamnim ami chaklo, onnbhovlo ani tantunt ami vaddleanv. Amche kuttumb Devachea mogan bhorlole korunk ani ho mog amchea xezareak ani Lhan Kristi Somudaiamnim ximpddaunk ami proitn korum-ia. Hê babtint, odik korun tornnatteank bori akarnni diunk amcho kherit husko zauncho. Hêch nodren, amcheam xikxonnik ghoramnim -- K.G. panvddear thavn suru korun -- ani kherit bhaxen Siminarimnim ani mottvaxi jivita akarnnê-ghoramnim ho Devacho mog ximpddaitolim sevokam ani dutam toiar korunk zotnaien vaurum-ia.

  1. Dor eka Bhavarteak aplea dispott’tea jivitant Kristi govaiki diunk apovnnem asa. Zhõi utramnim hi govaiki diunk zaina thõi moga-sevecheam kornniamnim ti jieunk zata. Amcheam vavracheam zageanr, bhou korun xikxonnik ani bolaikê-zotnaiecheam ghoramnim, ani rajkornnik-arthik-sonskrutik-somajik mollar Kristi totvam-muleamnim bhorloli jivitachi dêkh ami diunk favo. Amcheam kuttumbamnim ani Lhan Kristi Somudaiamnim oslem vatavoronn ami utpon korunk zai. Ho boro vavr kortana dusream mon’xankui hat diunk, vivad asa thõi sonvad ani xanti haddunk vavrunk chodd gorjechem. Hê porim odik ani odik Lhan Mon’xall Somudai amchê modem upzun ieum!

  1. Anik don vorsamnim Bhoktivont Juze Vazachea mornnachi tisri xotabdi ami monoitoleanv. Devacho mog ximpddaunk aplem chintinastana to poixilê Sri Lankêk gelo. Hoch Devacho mog odik hurben vistarchea monan, hea somarombha somoiar, poilê suater amcheach Mha-Dhormprantant poixileam ani gorib ganvamnim Povitr Sobhecho vavr cholta tea khatir amchea magnneacho ani soho-vavracho udar tenko vaddounk ami proitn korum-ia. Bhoktivont Juze Vazachea panvlamnim panvlam ghalun Kristi sondêx poixileam desamnim vhorunk bhar gheum-ia.

Devan amcheam kallzamnim otlolea mogachi sakxi dium-ia: zhõi ami asanv ani zhõi chodd goroz asa thõi Jezuchea Mogachea Ujean, Devacho Mog Ami Ximpddaum-ia!